Kreu i Partisë Demokratikë të Kosovës, Memli Krasniqi, se bashku me kryetarin e Komunës së Prizrenit, Shaqir Totaj, kanë vizituar shtëpinë e të moshuarve “Jetimat e Ballkanit”, përcjell InLajmi.
Vizita u zhvillua për nder të Ditës Ndërkombëtare të Solidaritetit Njerëzor, Krasniqi ka falënderuar humanistin e njohur kosovar Halil Kastratin për kontributin e dhënë si shembull i jashtëzakonshëm për bamirësi.
Krasniqi ka thënë se Kastrati është i mbështetur nga donator brenda dhe jashtë vendit, njerëz qe tregojnë solidaritetin e tyre njerëzor më nevojtarë në Kosovë.
Tutje ai u ka uruar banorëve shëndet e jetë të gjate, kurse punëtorëve i’u ka uruar punë të mbarë në angazhimin e tyre human e solidar.
Postimi i plotë i tij:
Në Ditën Ndërkombëtare të Solidaritetit Njerëzor, së bashku me Kryetarin e Prizrenit, Shaqir Totaj, sot ishim në vizitë tek shtëpia e të moshuarve “Jetimat e Ballkanit”, në Gjinoc të Suharekës, që u realizua nga humanisti jonë i njohur, hoxhë Halil Kastrati, të cilin e falënderova për kontributin dhe shembullin e jashtëzakonshëm për bamirësi.
Në Kosovë, kur flasim për solidaritetin është e pamundur të mos e mendosh Halil Kastratin. Ai, i mbështetur nga shumë donatorë brenda dhe jashtë Kosovës, njerëz zemërgjerë që dhurojnë për ata që janë sfiduar më shumë nga jeta, edhe këtë vit kanë treguar solidaritetin e tyre njerëzor me shumë nevojtarë të vendit tonë, duke i ndihmuar në forma të ndryshme.
Halilin e përgëzova edhe për ndërtimin e 149 shtëpive për familje skamnore, që i ka dorëzuar para pak ditësh, në shënim të dhjetë vjetorit të Shoqatës që ai e udhëheqë. Vërtetë, Halili dhe bashkëpunëtorët e tij kanë ndihmuar edhe aty, ku, fatkeqësisht, jo gjithmonë ka arritur të shkojë edhe vet dora e shtetit.
Banorëve ju urova shëndet e jetë të gjatë, ndërsa punëtorëve punë të mbarë në angazhimin e tyre human e solidar. /InLajmi/
