Kreu i Aleancës për Ardhmërinë e Kosovës, Ramush Haradinaj,ka thënë se diaspora i jep kuptim festave dhe që pa ta do të ishin të zbehta, përcjell InLajmi.
Ai për diasporën ka thënë se janë ata të cilët gjallërojnë vendin duke kontribuar në ekonominë e shtetit, përderisa shteti i Kosovës po përballet me pandeminë sikur të gjitha vendet e botës ku mërgata jeton dhe vepron, për fat të mirë Kosova në këtë fazë ka shumë pak të infektuar.
Tutje ai i ka bërë thirrje Qeverisë së vendit, të heqin masën e ndalim qarkullimit kështu duke i mundësuar diasporës udhëtim të lirë, jo ti kufizojmë me masa ka thënë Haradinaj.
Postimi i plotë i tij:
Të dashur motra e vëllezër që jetoni jashtë vendit,
Rrugët tuaja drejt vendlindjes nuk u ndalën asnjëherë, as dikur në rrethana okupimi e as sot në liri. Ju i jepni kuptim festave të fundvitit, të cilat do të ishin të zbehta pa ju dhe kjo jo vetëm për faktin që familjet çmallen me ju, por edhe gjallërimi që i bëni ekonomisë së shtetit tonë të përbashkët, vendlindjes tuaj.
U bë më shumë se një vit që edhe Kosova po përballet me pandeminë, ashtu sikur vendet ku jetoni e punoni ju. Fatmirësisht, në këtë fazë ne kemi shumë më pak të infektuar.
Sot i bëj thirrje Qeverisë së Kosovës, që të heqin masën e ndalim qarkullimit, për të mundësuar kështu, udhëtim të lirë e të papengesa për diasporën tonë. Ne duhet t’i mirëpresim motrat e vëllezërit tanë, e jo t’i kufizojmë me masa që ekspertët po i konsiderojnë jo shkencore dhe jo të nevojshme për menaxhimin e pandemisë.
Të dashur bashkatdhetarë. Mirë se vini në shtëpinë tuaj!
RH /InLajmi/
