Policia e Kosovës ka bërë të ditur se ka ndodhur një aksident trafiku sonte rreth orës 18:00 në aksin rrugor Malishevë – Dule, përkatësisht në Banjë të Malishevës, përcjell InLajmi.
Sipas policisë, janë lënduar 2 persona.
“Deri tek aksidenti ka ardhur derisa i dyshimti po drejtonte automjetin e tij “Mercedes”, i cili ishte duke lëvizur përgjatë aksit rrugor Malishevë – Dule dhe kur arrin në fshatin Banjë nuk përshtat shpejtësinë e lëvizjes automjetit, ku rruga është me kthesë dhe humb kontrollin mbi automjetin e tij duke dalë nga shiriti i djathtë në të majtë dhe me pjesën ballore e godet automjetin “Alfa Romeo” që po lëvizte në drejtim të kundërt. Si pasojë e aksidentit në të 2 automjetet shkaktohen dëme materiale dhe 2 të lënduar”, tha ai.
Personat e lënduar janë dërguar për trajtim mjekësor në Emergjencën e Malishevës, ku njëri prej tyre, për shkak të frakturave, është transferuar në QKUK Prishtinë për trajtim të mëtejshëm. Sipas mjekut kujdestar, personat e lënduar janë jashtë rrezikut për jetë./InLajmi/
