Këto ditë është arritur një marrëveshje në mes të Danimarkës dhe Kosovës lidhur me burgjet në vendin tonë, shkruan InLajmi.
Danimarka ka nënshkruar marrëveshje me Kosovën për të marrë hua 300 çeli në burgjet e Kosovës, gjegjësisht do të shfrytëzohen qendrat korrektuese të Gjilanit.
E nga kjo marrëveshje ndërkombëtare Kosova për 10 vite përfiton 60 milion euro investime në energji të ripërtrirëshme dhe 150 milion euro për nevojat tjera që ka Republika e Kosovës.
Lidhur me këtë çështje, njohësi i çështjeve të sigurisë, Avni Islami në një prononcim për Gazetën InLajmi ka deklaruar se krejt kjo ngjarje ka një arsye të mirë, se pse Danimarka ka besim në institucionet e vendit.
“Pranimi i 300 të burgosurëve nga Danimarka në burgjet e Kosovës është një sinjal, thjeshtë se Danimarka si shtet anëtare e BE-së ka besim në institucionet e vendit. Mendoj se është një rast i mirë që institucionet e vendit të tregojnë para Bashkësisë ndërkombëtarë një sistem që është konform standardeve ndërkombëtare, pra i plotësojnë kushtet se si trajtohen të burgosurit në vendin tonë”,tha Islami për Gazetën InLajmi.
Tutje, ai theksoi se në këtë çështje nuk ka asgjë të keqe, dhe se huazimi i qelive, nëse nuk do të kërkohej në Kosovë do të mund të kërkohej edhe në vende tjera.
“Duke ja shtuar krejt kësaj edhe donacionin që do ta marrë Kosova që këta të burgosur të trajtohen këtu, besoj se këtu s’ka asgjë të keqe, është vetëm një sinjal i mirë se sistemi i drejtësisë është sistem i standardizuar në Kosovë dhe me standarde ndërkombëtarë. Danimarka ka kërkuar 300 qeli jo të përbashkëta. Dhe qelitë janë vende të mbyllura të siguruara në nivelin më të lartë të sigurisë dhe asgjë të keqe nuk shoh. Përndryshe ata të burgosur që do të vendosen nëpër qeli në burgjet e Kosovës kanë mujt me qenë në Afrikë, apo në çfarë do vendi tjetër, theksoi Islami.
E praktika të tilla, tha tutje Islami për sjellje të të burgosurve nga vende të Bashkimit Evropian nuk ka pasur më herët në Kosovë, e as në rajon.
“S’ka pas praktika të tilla ma herët as në Kosovë e as në rajon, por në këtë rast, pse Danimarka po i sjellë 300 të burgosur në vendin tonë është Kosova e ka besueshmërinë ma të lartë sesa vendet e rajonit, kjo është besoj njëra nga arsyet”, tha tutje ai.
Edhe juristi Arbër Jashari, ka thënë se arsyeja se pse Danimarka po i sjellë 300 të burgosur në Kosovë, është sepse vendi ynë respekton të drejtat dhe liritë themelore të njeriut.
“Marrëveshja me Danimarkën, për transferimin e të burgosurve danez në Kosovë, nënkupton se Kosova është partner serioz, respekton të drejtat dhe liritë themelore të njeriut, institucionet korrektuese të Kosovës, janë të një standardi të lartë, ka kapacitete të mjaftueshme njerëzore dhe profesionalizëm”, ka thënë Jashari për Gazetën InLajmi.
Ndryshe, zëvendësministri i Drejtësisë, Blerim Sallahu, së fundmi është deklaruar lidhur me këtë çështje, ku ndër të tjera ka thënë se Mbretëria e Danimarkës ka vlerësuar nivelin e lartë të sigurisë dhe infrastrukturën e burgjeve të Kosovës.
“Prandaj, ka përzgjedhur Kosovën si palë e denjë nënshkruese të kësaj marrëveshje. Me këtë marrëveshje Mbretëria e Danimarkës do ta shfrytëzojë qendrën korrektuese të Gjilanit për mbajtjen e 300 personave të dënuar që do të transferohen nga qendrat korrektuese të Mbretërisë së Danimarkës. Kur ke Qeveri që lufton krimin dhe korrupsionin investimet nuk mungojnë”,ka shkruar Sallahu. /InLajmi/
