Kryeministri i Kosovës, Albin Kurti, i shoqëruar nga ministrja e Ekonomisë Artane Rizvanolli dhe Ministri i Financave Hekuran Murati gjatë ditës se sotme kanë zhvilluar vizitë në Termocentralin Kosova B, raporton InLajmi.
Gjatë vizitës së sotme ministrja Rizvanolli është pyetur nëse Shqipëria pritet ta ndihmojë Kosovën në përballjen e saj me krizën energjetike. Lidhur me këtë ajo është përgjigjur se kanë filluar bisedimet me të gjitha nivelet, me ministrat, kryeministrin e zëvendëskryeministrin dhe në nivel të KEK-ut dhe KESH-it.
Sipas saj tash së fundmi Republika e Shqipërisë ka importuar rreth 3 milion euro energji për vete dhe e ka pasur të pamundur të ndihmoj Kosovën.
“Kemi filluar bisedimet me të gjitha nivelet, me ministrat, kryeministrin e zëvendëskryeministrin dhe në nivel të KEK-ut dhe KESH-it dhe institucioneve tjera relevante dhe këto bashkëbisedime janë intensifikuar javëve të fundit kur gjendja tek ne ka filluar të përkeqësohet. Republika e Shqipërisë deri tash vonë ka qenë duke importuar deri në 3 milionë euro energji për vete e ka pasur të pamundur të na ndihmojë përmes këmbimit. Këto ditë jam duke i parë mezi janë duke e mbuluar kërkesën e vetë dhe kemi premtime që në momentin që është e mundur sado pak do të na ndihmojnë për ta kaluar këtë krizë, ndërsa ne do ta këmbejmë megavat për megavat kur ata kanë nevojë e ne kur të kemi tepricë”, tha Rizvanolli para medieve./InLajmi/
