Mikrovala, televizori, kompjuteri dhe konsola e video-lojërave janë pajisjet për të cilat ministrja e Ekonomisë, Artane Rizvanolli, ka kërkuar që të mos lihen në ‘standby’ përgjatë periudhës së krizës energjetike.
Megjithatë, të gjitha këto bashkë as nuk i afrohen pajisjeve të prodhimit të kriptovalutave, Kur vjen në shprehje sasia e energjisë elektrike që kërkojnë për funksionim. Një mikrovale moderne në ‘standby’ shpenzon rreth 3 Watt të energjisë për 24 orë.
Konzola e lojërave, në anën tjetër, në po të njëjtin modalitet, harxhon mesatarisht 0.0045 kW përbrenda një dite. Kompjuteri në standby merr rreth 3-10 watt. Televizori modernë merr 0.5-3 W. Të gjitha këto bashkë nuk bëjnë as 20 W.
Të gjitha pajisjet në fjalë janë përmendur në këshillimet e ministres Rizvanolli për evitimin e krizës energjetike që ka prekur edhe Kosovën
“Të mos lihen në pozicion standby pajisjet elektronike: Mikrovalët, televizori, radio, kompjuterët dhe konsola e video-lojërave”,thuhet në postimin e shpërndarë në profilin zyrtar të ministres.
Mirëpo, të gjitha këto as që nuk i afrohen shpenzimeve të makinave për prodhimin e kriptovalutave, për të cilat nuk dihet numri i saktë i tyre, ndonëse është raportuar më herët se funksionojnë në veri të vendit.
Në mënyrë që të kryhet transaksioni i kriptovalutës Bitcoin nga pajisjet për prodhimin e tyre deri tek kuleta ku arkëtohen ato, nevojiten 707 kW të energjisë elektrike.
Në anën tjetër, Ethereum-i, e cila radhitet si kriptovaluta e 2 pas Bitcoin-it, merr 62.56 kW për të kryer transaksion në të njëjtin relacion.
Përgjatë këtij viti, Qeveria ka ndarë mjete prej 17.7 milionë eurosh në kuletën e KOSTT-it që paguajnë për banorët e veriut.
KOSTT-i ka bërë të ditur gjatë muajit maj se konsumi i energjisë elektrike ka shënuar rritje në komunat veriore gjatë viteve të fundit, raporton lajmi.net.
“Është evidente që konsumi i energjisë elektrike në vitet e fundit ka shënuar rritje në komunat veriore të Kosovës. Rritja e konsumit në vitin 2019 në raport me vitin 2018 ka qenë 7% ndërsa në vitin 2020 konsumi në Veri ka qenë për 13 % më e lartë krahasuar me vitin 2019”.
