Policia e Kosovës ka njoftuar se mbrëmjen e së dielës ka ndihmuar në evakuimin e 2 familjeve që kishin mbetur të bllokuara në fshatin Shtupeq i Vogël në Rugovë, për shkak të reshjeve të mëdha të borës, përcjell InLajmi.
“Më datën 12.12.2021, rreth orës 15:00, Stacioni për Mbikqyrje të Kufirit Vitomiricë/Radavc, kanë pranuar informacionin nga një qytetar se 2 familje kanë mbetur të bllokuara nga bora e madhe në fshatin Shtupeq i Vogël në Bjeshkën e Rugovës. Patrulla kufitare , menjëherë është nisur për në lokacionin në fjalë, por për shkak të kushteve shumë të vështira dhe rrugës së bllokuar nga bora , pas disa orëve kanë arritur në fshatin Shtupeq i Vogël për t’ju dhënë ndihmë atyre”, thuhet në njoftimin e Policisësë Kosovës.
Sipas policisë në mbështetje kanë dalë edhe 3 qytetarë vullnetarë të cilët i falënderuan për bashkëpunimin.
“Zyrtarët policorë nga kufiri kanë arritur t’i takojnë dhe t’u ndihmojnë qytetarëve të cilët kanë mbetur të bllokuar në borë, ku në mesin e tyre ishin edhe 2 fëmijë. Nga Policia është bërë shoqërimi i tyre deri në qytetin e Pejës”, thuhet tutje./InLajmi/
