Pas nënshkrimit të marrëveshjes në mes të Ministrisë së Financave, Punës dhe Transfereve dhe Bankës Evropiane për Rindërtim dhe Zhvillim (BERZH) për ndërtimin e impiantit për trajtimin e ujërave të zeza në Mitrovicë, Kryeministri i republikës së Kosovës, Albin Kurti, së bashku me Shefin e stafit të Kryeministrit, Luan Dalipi priti në takim Drejtorin Rajonal të BERZH për Ballkanin Perëndimor, Matteo Colangeli, përcjell InLajmi.
Kryeministri Kurti e falënderoi Colangeli dhe BERZH-in për nënshkrimin e marrëveshjes në fjalë, duke e cilësuar atë si shumë të rëndësishme në përmirësimin e infrastrukturës, e cila kontribuon në shëndetin publik. Ndërsa z. Colangeli shprehu falënderimin e tij për bashkëpunimin e deritanishëm dhe tha se BERZh-i është i vendosur për të rritur shkallën e mbështetjes në Kosovë në fushat me interes të përbashkët.
”Një prej këtyre fushave është ajo e mjedisit dhe energjisë. Me këtë rast, kryeministri Kurti e njoftoi z.Colangeli dhe delegacionin e pranishëm se jemi duke punuar në hartimin e Strategjisë së Energjisë e cila përveç dekarbonizimin deri në viti 2050, për vizion ka edhe pastrimin e ajrit. Në të njëjtën kohë, kjo strategji synon që të ruaj sigurinë e furnizimit me energji dhe përballueshmërinë për konsumatorët duke rritur përdorimin e energjisë së pastër, dhe të sigurojë integrimin në tregun rajonal. Pra një tranzicion të drejtë dhe të gjelbër energjetik”, u shpreh kryeministri Kurti.
Gjatë takimit u bisedua edhe për mundësitë dhe format e bashkëpunimit me sektorin privat në shërbim të rritjes së kapaciteteve të tyre.
”Kryeministri Kurti përmendi synimin dhe planet e qeverisë për sistemin dual të arsimit, si zgjidhja drejt zvogëlimit të hendekut në mes të aftësive profesionale dhe tregut të punës. Kjo do të mundësonte rritjen e produktivitetit brenda sektorit privat dhe rrjedhimisht gjenerimin e vendeve të reja të punës, si një nga prioritetet e qeverisë sonë”, tha kryeministri Kurti.
Ai po ashtu foli edhe për reagimin pozitiv të ekonomisë gjatë qeverisjes së tij, me ç’rast të hyrat janë rritur për 1/3-tën, eksportet janë rritur për 2/3-tën ndërsa sipas vlerësimit të Bankës Qendrore të Kosovës, ekonomia jonë do të rritet për 9.9%./InLajmi/
