Gjermania ka miratuar të premten, ligjin që obligon punëtorët shëndetësorë të vaksinohen kundër koronavirusit.
Vendimi që u votua në Bundestag kërkon që stafi i spitaleve, zyrave të doktorëve e shtëpive të kujdesit, të jenë të vaksinuar plotësisht deri në mes të muajit mars të vitit 2022.
Ky vendim erdhi pas vendimeve të ngjashme nga Franca, Italia, Britania e Madhe dhe Greqia.
Ministri i Shëndetësisë, Karl Lauterbach që mori pozitën këtë javë me qeverinë e re të udhëhequr nga Olaf Scholz, i kërkoi deputetëve nga spektre të ndryshme politike që të aprovojnë masën për grupet e ndjeshme.
“Pandemia është një mision për të gjithë ne, ky nuk është një moment për politika të partive”, i tha ai deputetëve para votimit.
Ai tha se shpreson që Gjermania mund të thejë një valë të 4 të infektimeve deri në fund të muajit në mënyrë që njerëzit të mund të vizitojnë familjet e tyre për festa.
“Kjo është ajo për të cilën po luftojmë”, tha ai, duke theksuar se duhet të ndalojnë shpërndarjen e variantit Delta si dhe variantit Omicron.
Scholz që mori pushtetin të mërkurën ka dalë fuqishëm pro vaksinimit të detyrueshëm pasi fushata vullnetare nuk ishte e suksseshme me më pak se 70% e popullsisë të vaksinuar plotësisht.
Rreth 21% e popullatës kanë marrë një dozë përforcuese.
Nëse qeveria e zgjeron urdhëresën te popullata e gjerë do të thotë ndjekje e shembullit të shtetit fqinj, Austrisë që po e bën vaksinimin e detyrueshëm nga shkurti i vitit 2022.
Qeveria e kaluar e udhëhequr nga Angela Merkel gjithmonë e ka përjashtuar vaksinimin e detyrueshëm, shkruan REL.
Gjermania arriti numër rekord të infektimeve prej 61.288 raste të reja në 24 orët e fundit të premten si dhe 484 vdekje, sipas Institutit Robert Koch.
