Komisioni Qendror i Zgjedhjeve (KQZ) deri më sot ka pranuar 262 pako të supozuara me fletëvotime, në procesin e përsëritjes së raundit të 2 të zgjedhjeve për kryetar të Komunës së Dragashit, shkruan InLajmi.
Këtë e ka konfirmuar për Gazetën InLajmi, zëdhënësi i KQZ-së Valmir Elezi.
“Është duke vazhduar periudha për përsëritjen e votimit për raundin e 2 të zgjedhjeve për kryetar të Komunës së Dragashit, e cila ka filluar më 29 nëntor. Deri më tani, KQZ ka pranuar 262 pako të supozuara me fletëvotime”, tha Elezi.
Tutje, Elezi njoftoi se KQZ-ja do të pranojë fletëvotime më së largu deri më 13 dhjetor.
“Duke u mbështetur në ligj, KQZ do të pranojë fletëvotime më së largu deri më 13 dhjetor. Të drejtën për të votuar përmes postës e kanë vetëm 1.090 votuesit jashtë Kosovës të komunës së Dragashit, të cilët janë regjistruar si votues jashtë Kosovës gjatë periudhës 10 korrik – 18 gusht 2021”, shtoi tutje Elezi.
Derisa janë pako të supozuara, Elezi tha se fletëvotimet që janë pranuar ende nuk janë hapur dhe nuk dihet se a janë krejt në rregull.
Ndryshe, ky rivotim erdhi pasi që Gjykata Supreme ka vendosur që votat e ardhura me postë nga jashtë për Komunën e Dragashit të mos njihen. Krejt kjo për shkak të parregullsive./InLajmi/
