Në pikën kufitare në Merdare, rruga ka qenë e bllokuar për afro një orë, kjo për shkak të një mjeti shpërthyes.
Në lidhje me këtë çështje, Policia e Kosovës ka dhënë detaje duke theksuar se pjesëtarët e KFOR-it, kanë kërkuar të ndalet qarkullimi i përkohshëm i personave dhe automjeteve.
Zëdhënësi i Policisë së Kosovës, Baki Kelani ka thënë për Gazetën Express se pjestarët e KFOR-it kishin kërkuar nga Policia e Kosovës që përkohësisht ta ndalojnë qarkullimin e personave dhe automjetëve në atë zonë meqë kanë qenë duke e bërë një shpërthim të kontrolluar të një mjeti shpërthyes.
Kelani njoftoi se rruga është liruar për qarkullim normal rreth orës 18:30.
“Më datën 08.12.2021 rreth orës 17:30 në stacionin policor kufitar (SPK-Merdare) nga pjestarë të KFOR-it është kërkuar ndalimi i përkohëshëm i qarkullimit të personave dhe automjeteve, për aryse se janë duke bërë shpërthimin në mënyrë të kontrolluar të një mjeti shpërthyes. Lokacioni i mjetit shpërthyes ka qenë në distancë mbi një kilometër larg pikës kufitare, por për shkaqe sigurie për një kohë të shkurtër është ndërprerë qarkullimi. Reth orës 18:20 rruga është liruar për qarkullim normal, pa problem”, ka thënë Kelani.
