Shërbimi i Policisë Kufitare në Morinë, kanë sekuestruar një pajisje për prodhimin e kriptomonedhave dhe 39.000 euro, përcjell InLajmi.
Policia Kufitare, si rezultat i kontrolleve të shtuara kanë ndaluar një automjet drejtuesi i të cilit ishte i gjinisë mashkull shtetas Maqedonas i moshës 33 vjeçar ku në automjet janë kapur 39.000 euro të pa deklaruara dhe një pajisje që dyshohet të jetë për prodhim të kriptomonedhave.
Pas përfundimit të veprimeve të para, me rastin po merren organet kompetente.
Postimi i plotë i Policisë Kufitare:
Morinë, Kukës
Policia Kufitare, në bashkëpunim me strukturat hetimore të DVP Kukës dhe autoritetet doganore, godet një rast të mosdeklarimit të të hollave në kufi.
Sekuestrohen 39.000 euro dhe një pajisje për prodhimin e kriptomonedhave.
Shërbimet e Policisë Kufitare në Morinë, si rezultat i kontrolleve të shtuara, me qëllim parandalimin dhe goditjen e paligjshmërisë, bazuar në analizën e riskut, në hyrje të RSH-së, në bashkëpunim me strukturat hetimore të DVP Kukës dhe autoritetet doganore, kanë kaluar në vijën e dytë, për kontroll më të imtësishëm, automjetin me drejtues shtetasin B. B., 33 vjeç, banues në Maqedoninë e Veriut.
Gjatë kontrollit të ushtruar në automjet, shërbimet e Policisë gjetën dhe sekuestruan 39.000 euro, të cilat ky shtetas nuk i kishte deklaruar, si dhe një pajisje që dyshohet se përdoret për prodhimin e kriptomonedhave.
Në përfundim të veprimeve të para të kryera nga specialistët e Seksionit për Hetimin e Krimit Ekonomik e Financiar në DVP Kukës, u procedua penalisht drejtuesi i mjetit, shtetasi B. B., për veprën penale “Mosdeklarimi i të hollave dhe i sendeve me vlerë në kufi”.
Materialet do t’i kalojnë Prokurorisë së Rrethit Gjyqësor Kukës, për veprime të mëtejshme. /InLajmi/
