Kreu i PDK-së, Memli Krasniqi, ka komentuar karrierën e xhudistes së njohur kosovare, Majlinda Kelmendi, pas pensionimit të saj, përcjell InLajmi.
Krasniqi ka shkruar se, pensionimi i Kelmendi, është vetëm përfundimi i një epoke dhe fillimi i një tjetre.
Më pas Krasniqi u shpreh mjaft krenar përderisa ka bërë detyrën si Ministër i Kulturës, Rinisë dhe Sportit dhe ka pasë mundlsinë të punoj nga afër me Federatën e Xhudos së Kosovës.
Tutje ai i ka uruar shumë fat Majlindës në karrierën e saj tl re, si trajnere e xhudos, duke shtuar se do të mbetesh gjithmonë e arta e jonë e parë Olimpike.
Postimi i plotë i tij:
Majlinda Kelmendi – përfundimi i një epoke, e fillimi i një tjetre!
Me 29 medalje të arta, 6 të argjendta, 9 të bronzta – përfshi këtu një medalje të artë Olimpike në Rio 2016, i ka dhënë fund karrierës së saj magjike sportistja më e mirë e të gjitha kohërave në vendin tonë, Majlinda Kelmendi.
Në mbi 20 vite të karrierës së saj, Majlinda i solli krenari, emocione e lot gëzimi familjes, shoqërisë, qytetit, shtetit e gjithë kombit të saj.
Jam jashtëzakonisht krenar që si Ministër i Kulturës, Rinisë dhe Sportit kam pasur mundësinë të punoj nga afër me Federatën e Xhudos së Kosovës. Së bashku kemi krijuar kushte që vlerësojnë kampionët dhe ua mundësojnë atyre garimin nën flamurin e shtetit tonë.
Kosova jonë e vogël ka valuar flamurin e saj nëpër qendrat më të mëdha botërore për vite me radhë, përkrah, e shumë herë edhe mbi flamujt e shteteve më të fuqishme, falë punës së Majlindës dhe mjeshtrit Toni Kuka.
Kosova do të jetë gjithmonë mirënjohëse për përfaqësimin tënd dinjitoz, Majlinda.
Të uroj shumë fat në karrierën tënde të re, si trajnere e xhudos, e së bashku me Tonin presim edhe shumë kampionë nga duart tuaja.
Për ne, do të mbetesh gjithmonë e arta e jonë e parë Olimpike, ambasadorja më e suksesshme e shtetit tonë dhe frymëzimi i brezave të rinj të sportisteve e të sportistëve.
Faleminderit, kampione!/InLajmi/
