Aktori Alec Baldwin ka mohuar përgjegjësinë për të shtënat me armë zjarri gjatë xhirimeve të një filmi në muajin tetor ku mbeti e vrarë drejtoresha e fotografisë dhe u plagos regjisori gjatë xhirimeve të një filmi.
“Mendoj se dikush është përgjegjës për atë që ka ndodhur dhe nuk mund ta them se kush është. Mirëpo e di që nuk jam unë”,ka thënë Baldwin.
Këto kanë qenë komentet e tij të para për të shtënat e 21 tetorit gjatë xhirimeve të filmit Rust në Nju Meksiko.
Kinematografia me prejardhje nga Ukraina, Halyna Hutchins ka mbetur e vdekur derisa regjisori, Joel Souza është plagosur.
Baldwin gjatë një interviste për transmetuesin amerikan ABC, ka thënë se atë e kanë informuar se arma është “e sigurt”, mirëpo në të ka pasur municion, ku sipas tij, është e domosdoshme që hetuesit të kuptojnë se kush e ka vënë plumbin në armë.
Gjatë intervistës, ai ka thënë se nuk e beson se do të akuzohet penalisht për këtë rast, shkruan Euronews.
Autoritetet në Nju Meksiko janë duke hetuar ende këtë rast dhe ende nuk kanë ngritur padi.
