Oda e Hotelierisë dhe Turizmit e Kosovës ka mbajtur një konferencë për media duke reaguar për masat e caktuara nga Qeveria e Kosovës kundër Covid-19, raporton InLajmi.
Kryetari i Odës së Hotelierisë dhe Turizmit, Hysen Sogojeva, ka thënë që zgjatja e afatit të TVSH-së të bëhet për 5 vite. Të zgjatet orari deri në orën 01:00 pasi zgjatja e orarit deri në ora 23:00 është absurde. Ai kërkon që të hiqet ora policore dhe të fillohet mbajtja e ahengjeve. Duke premtuar se do të mbajnë përgjegjësi se në këto ahengje do të hyjnë vetëm ata që janë të vaksinuar me të 2 dozat.
Tutje Sogojeva kërkon që të bëhet përkrahja e bizneseve pasi ende nuk ka filluar pastaj mbulimi i qirave nuk është bërë dhe bizneset që nuk kanë punuar fare as që janë ndihmuar.
“Zgjatja e afatit të TVSH-së të bëhet për 5 vite, përkrahja e bizneseve ende nuk ka filluar, mbulimi i qirave nuk është bërë, bizneset që nuk kanë punuar fare, nuk janë ndihmuar. Me vendimin e mbrëmshëm po ju njoftoj që shkresat që i kemi dorëzuar zëvendëskryeministrit dhe ministrit të Shëndetësisë, ku u kemi thënë që çdo vendim që merret pa u konsultuar me ne është i njëanshëm. Ne kemi kërkuar që orari të zgjatet deri në orën 01:00, të hiqet ora policore, të fillojnë mbajtja e ahengjeve, ku i kemi thënë që ne mbajmë përgjegjësi se në këto ahengje do të hyjnë vetëm ata që janë me 2 vaksinat”, tha Sogojeva.
Drejtor i departamentit për estradë, Afrim Muçiqi, ka shprehur pakënaqësitë se ky vendim i mbrëmshëm i Qeverisë së Kosovës për masat e reja anti-Covid është i papranueshëm pasi sipas tij sektorit të tyre po i bëhet e padrejtë. Muqiqi tregon se kanë premtuar që në ahengje të mos ketë persona të pavaksinuar.
“Ky vendim i mbrëmshëm është i papranueshëm për ne pasi që është vendosur prapë standard i dyfishtë pasi që edhe një herë sektorit tonë u bë e padrejta. Ne kemi folur që të marrim përgjegjësi që mos të ketë persona të pavaksinuar në këto ahengje. Jemi të anashkaluar nga rimëkëmbja”, tha Muçiqi.
Pëndryshe sipas vendimit të Qeverisë së Kosovës disa prej masave mbesin pothuajse të njëjta, përfshirë këtu edhe punën e gastronomisë që lejohet nga ora 05:00 deri në ora 23:00, ndërkaq muzika lejohet deri në ora 21:30. /InLajmi/
