Presidentja e Kosovës, Vjosa Osmani, ka takuar presidentin e Sllovenisë Borut Pahor, përcjell InLajmi.
Osmani shprehu se ishte kënaqësi të mirëpriste sërish në Kosovë presidentin e Sllovenisë.
Ajo shton se dy vendet gëzojnë një partneritet të mirë. Madje ajo ka kërkuar ndihmë nga presidenti Pahor për mbështetje për liberalizim të vizave për qytetarët e vendit tonë.
Tutje Osmani ka treguar se i ka konfirmuar presidentit Pahor që Kosova është kontribuese aktive për ruajtjen e paqes dhe stabilitetit dhe i ka bërë thirrje për koordinim dhe bashkëpunim në drejtim të luftimit të tendencave dhe forcave destabilizuese të cilat janë gjithnjë e në rritje në rajonin tone.
Postimi i plotë i saj:
Kënaqësi të mirëprës sërish në Prishtinë presidentin e Sllovenisë, z. Borut Pahor.
I shpreha mirënjohjen për përkrahjen e vazhdueshme të Sllovenisë për Kosovën që nga vitet ’90 e këtej. Dy vendet tona gëzojnë një partneritet të mirë e ne sot u zotuam që këto raporte t’i thellojmë akoma më shumë duke intensifikuar komunikimin dhe shkëmbimin në fusha të interesit të përbashkët.
Në takim theksova që orientimi Euro-Atlantik i Kosovës mbetet përherë i palëkundur dhe kërkova ndihmën e Presidentit Pahor në këtë drejtim, duke potencuar nevojën për mbështetje për liberalizim të vizave për qytetarët e vendit tonë.
Duke folur për zhvillimet e fundit në rajon, i konfirmova Presidentit Pahor që Kosova është kontribuese aktive për ruajtjen e paqes dhe stabilitetit, përderisa theksova se Kosova mbetet e përkushtuar për dialog i cili duhet të përqendrohet në njohjen reciproke. Me këtë rast, bëra thirrje për koordinim dhe bashkëpunim në drejtim të luftimit të tendencave dhe forcave destabilizuese të cilat janë gjithnjë e në rritje në rajonin tonë. /InLajmi/
