Federata e Sindikatave të Shëndetësisë së Kosovës (FSSHK) nuk po heqë dorë nga kërkesa e tyre, që të miratohet Ligji për Paga.
Ata po “kërcënojnë” me greva në rast se nuk merret ndonjë hap nga Qeveria për t’a bërë këtë Ligj.
Grevën do e nisin nesër në orën 07:00 të mëngjesit deri në orën 15:00 në të gjitha institucionet shëndetësore publike të Republikës së Kosovës.
Por, ata po paralajmërojnë masa edhe më radikale nëse edhe nesër nuk do të ketë reflektim nga Qeveria.
Kryetari i kësaj Sindikate, Blerim Syla, tha për Front Online, se grevë do të ketë edhe pas një jave.
“Nesër fillon greva 07:00 deri në orën 15:00, nesër është greva në krejt Kosovën atëherë presim edhe një javë deri në të ënjten tjetër, dhe edhe një herë do ta mbajmë grevën sepse krejt këtë po e bëjmë për shkak të pacientëve, dhe nëse edhe atëherë nuk mundemi mu marr vesh prapë do të koordinohemi me sindikatat tjera dhe ta shohim”, tha ai.
Kjo masë radikale nuk po përkrahet nga i gjithë stafi shëndetësorë.
Përfaqësuesi i Sindikatës së Infermierëve, Fitim Havolli, tha se nuk kanë pasur takime për të biseduar lidhur me këtë çështje.
“Jo nuk ka pasë takim dhe aspak koordinim në lidhje me këtë”, tha ai.
Edhe të martën, kjo Sindikatë njoftoi se nuk i mbështetë protestat e Federatës së Sindikatave të Shëndetësisë së Kosovës (FSSHK).
“Sindikata e Infermierëve, mamive dhe profesionistëve tjerë shëndetësor të Kosovës nuk i mbështetë protestat e organizatave tjera të paralajmëruara për ditët në vijim. Këtë vendim e mbështesim në faktin që konsiderojmë që koeficienti për infermierët, mamitë dhe profesionistët tjerë shëndetësor në kujdesin primar dhe sekondar 2.20 dhe për ata në kujdesin terciar 2.25 nuk është vlerësim meritor i komuniteteve tona dhe profesionit në përgjithësi”, thuhej në njoftim.
Javë më parë Federata e Sindikatave të Shëndetësisë së Kosovës (FSSHK), mbajti një protestë të cilës iu bashkëngjit edhe SBASHK-u, ku prezantuan shqetësimet e tyre.
Qeveria e Kosovës ka vazhduar të qëndroj e heshtur sa i përket këtyre kërkesave.
Për këtë edhe portali i ka dërguar pyetje Qeverisë, mirëpo nuk ka marrë asnjë lloj përgjigje.
