Nënkryetari i Sindikatës së Bashkuar të Arsimit Shkencës dhe Kulturës, Ymer Ymeri, ka thënë se i kanë bërë kërkesë Qeverisë së Kosovës që Ligji i Pagave të futet në projektbuxhetin e vitit 2022.
Sipas Ymeri, e vetmja mënyrë që ky ligj të filloj të realizohet edhe në rast aprovimi për vitin 2022, është që ta ketë koston buxhetore në ligjin e buxhetit për vitin 2022, teksa shtoi se deri më tani nuk kanë zhvilluar asnjë takim me kryeministrin Albin Kurti, apo me ministrin e Financave, Hekuran Murati.
“Shpresojmë që para datës së protestave të kemi dialog dhe të gjejmë zgjidhje në mënyrë që tek çështjet që i kemi ngritur”.
“Me një dialog një javor mund t’i tejkalojmë të gjitha këto sepse nuk është një kërkesë e papërballueshme për buxhetin e Kosovës. Nëse e kemi parasysh se që nga viti 2010 s’ka pasur ngritje të pagave në sektorin publik dhe buxheti që nga ajo kohë është rritu për rreth 40%, ndërsa buxheti i pagave ka mbetur në të njëjtin nivel”, është shprehur Ymeri.
Më tej, Ymeri tha në “Info Magazine” në Klan Kosova se kërkesë e SBASHK-ut është hartim i Ligjit për Paga, teksa tha se i kanë njoftuar të gjitha institucionet e vendit që nëse deri më 4 Dhjetor nuk kanë paralajmërim të sigurt se ky ligjj ka filluar të amandamentohet dhe nuk sigurohet që kostoja buxhetore të futet në projektbuxhetin e vitit 2022, ata do të organizojnë një protestë përpara objektit të qeverisë.
“Deri në janar nëse nuk do të ketë asgjë nga dialogu me qeverinë, atëherë do të ketë greva”, është shprehur Ymeri.
