Në seancën e sotme plenare të Kuvendit me 81 deputetë të pranishëm u miratua Raporti Vjetor i Agjencisë kundër Korrupsionit për vitin 2020.
79 vota ishin për, asnjë kundër dhe nuk kishte asnjë abstenim, njofton Klankosova.tv.
Nga Komisioni për Legjislacion, Adnan Rrustemi, tha se pas shqyrtimit që i kanë bërë e rekomandojnë miratimin e raportit.
Edhe kryetari i Komisionit për Buxhet, Punë dhe Transfere, Armend Muja, i rekomandoi Kuvendit miratimin.
Në anën tjetër ai në emër të Grupit Parlamentar të LVV-së, tha se e mbështesin Raportin por se duhet theksuar nevojën për fuqizimin e kësaj Agjencie dhe shtimin e angazhimit të saj në luftën kundër korrupsionit.
Ndërsa, Hajdar Beqa nga Grupi Parlamentar i PDK-së, tha se e kanë shqyrtuar Raportin dhe vlerësojnë se ka qenë një raporti i detajuar e i pasqyruar mirë, dhe e përkrahin.
Kurse Driton Selmanaj nga Grupi Parlamentar i LDK-së, deklaroi se përkundër sfidave si rezultat i pandemisë Agjencia ka sjellë një raport voluminoz dhe i japin mbështetje, raporton Klan Kosova
Si shqetësim ai ngriti faktin që, sipas tij faji i Kuvendit ky institucion qe gjashtë muaj nuk ka udhëheqës.
