Ministri në largim i Shëndetësisë i Çekisë, Adam Vojtech, ka thënë se do të propozojë një gjendje të re të jashtëzakonshme, për t’u marrë me rritjen e rasteve me COVID-19. Gjendja e jashtëzakonshme, ndër të tjera, do t’i lejojë autoritetet të vendosin studentë të mjekësisë në spitale.
Kurse kufizimet e reja për të pavaksinuarit hynë në fuqi sot. Një test negativ PCR/antigjen nuk është më i mjaftueshëm për të hyrë në restorante dhe parukeri, apo për të ndjekur ngjarje sportive apo kulturore. Do të mjaftojë vetëm prova e vaksinimit ose shërimit nga COVID-19.
Megjithatë, kryeministri në largim ka thënë se ndryshe nga Austria, nuk do të ketë asnjë bllokim të ri.
Qeveria e re, e cila duhet të emërohet në dy javët e ardhshme, është shprehur gjithashtu kundër një bllokimi të ri, megjithëse tani ka deklarata kontradiktore nga anëtarët e ardhshëm të kabinetit për këtë çështje, shkruan BBC.
Të dielën u regjistruan 8 mijë e 244 raste, shifra më e lartë për një ditë të diel, që nga fillimi i pandemisë. Ato pasojnë një rekord të ri prej më shumë se 23,000 rastesh në një ditë të vetme, transmeton Klankosova.tv.
Numri i njerëzve të hospitalizuar po rritet dhe disa kanë frikë se mund të përballen edhe një herë me shifrat maksimale të marsit, kur kishte nëntë mijë të shtruar në spital, dy mijë prej të cilëve në kujdes intensiv.
