Nga sot Austria bëhet vendi i parë evropian që hyn sërish në izolimin e 4, që nga nisja e pandemisë. Niveli i vaksinimit në këtë shtet është i ulët, ndërsa nivelet e të infektuarve vijojnë të rriten. Nga Shkurti 2022 Vjena do ta bëjë të detyrueshëm vaksinimin.
Masat e reja kufizuese do të jenë në fuqi deri më 13 Dhjetor. Sezoni i Krishtlindjes anulohet për disa javë e shumë austriakë nxituan të përfitojnë nga ditët normale. Shumë prej tyre janë dorëzuar, por bizneset janë ata të cilët do të ndiejnë më shumë lockdown.
“Puna ka qenë shumë mirë, askush nuk mendoi se do të kishte sërish izolim për Krishtlindje. Është e trishtueshme, ne nuk jemi aspak në një situatë të mirë”, thotë një qytetare.
Në disa qytete, Salzburg dhe Linz protestuesit u mblodhën për të kundërshtuar izolimin dhe vaksinimin e detyruar.
Në Bruksel, protestat paqësore kundër masave anti-COVID janë shndërruar në përplasje të dhunshme. Policia përdori gaz lotsjellës për të shpërndarë turmën.
Belgjika do ta bëjë të detyrueshme punën në distancë në pjesën më të madhe të javës dhe do të zgjerojë përdorimin e maskave, pasi numri i rasteve të reja me COVID po arrin nivele shqetësuese.
Republika Çeke do të zbatojë gjithashtu rregulla më të rrepta, veçanërisht me banorët e pavaksinuar. Testet negative të coronavirusit nuk do të njihen si një certifikatë COVID për të shkuar në parukeri apo restorant. Kompanitë duhet të testojnë punëtorët e pavaksinuar, shkruan Euronews.
Gjermania ka vendosur tashmë masa më të rrepta: mbyllje të disa vendeve publike, më shumë kontroll mbi të pavaksinuarit. Autoritetet gjermane po debatojnë nëse do ta bëjnë të detyrueshme vaksinën.