Me ftesë të autoriteteve qeveritare kroate, Zëvendësministri i Mbrojtjes, Shemsi Syla me delegacionin nga Ministria e Mbrojtjes dhe Shtabi i Përgjithshëm i FSK-së, sot morri pjesë në Manifestimin Përkujtimor, respektivisht Ditën e Përkujtimit të Viktimave të Luftës së Atdheut dhe Ditën e Përkujtimit të Viktimave të Vukovarit dhe Shkabrnjës, përcjell InLajmi.
Ky manifestim u organizua në shënim të 30 vjetorit të thyerjes së mbrojtjes së Vukovarit në vitin 1991 nga forcat serbe, si dhe masakrës në popullatën civile kroate nga forcat kriminale serbe në Vukovar dhe Shkabrnjë.
Me këtë rast, zv. Ministri Syla, përveç nderimeve më të larta shtetërore dhe ushtarake, u takua edhe me kryeministrin kroat Andrej Plenkovic, ministrin e mbrojtjes, Mario Banozic dhe ministrin e veteranëve të luftës, Tomo Medved.
Me këtë rast, liderët shtetëror kroat shprehën admirimin dhe mirënjohjen e lartë për kontributin e luftëtarëve shqiptarë në Betejën për Vukovarin dhe përgjithësisht në luftën çlirimtare të Kroacisë.
Mesazhi kryesor nga këto takime, ishte se historia e përbashkët e 2 popujve tanë është bazament i fuqishëm për të ndërtuar edhe të ardhmen e përbashkët si 2 vende dhe kombe, miq të natyrshëm.
Gjithashtu duke kujtuar dhe nderuar luftëtarët dëshmorë dhe civilët martirë do të kemi të sigurtë edhe të ardhmen tonë, duke mos harruar asnjëherë dhe kërkuar në vazhdimësi drejtësinë për njerëzit e pafajshëm kroat e shqiptarë, si dhe dënimin e agresorëve dhe kriminelëve serb që edhe sot e pas kaq vitesh ende nuk kanë marrë ndëshkimin e merituar. /InLajmi/
