Kancelarja e Gjermanisë, Angela Merkel, tha të enjten se vendi i saj do të rezervojë pjesë të madhe të jetës publike në zonat ku spitalet po mbushen në mënyrë të rrezikshme me pacientë me Covid-19 vetëm për personat që janë vaksinuar ose që e kanë kaluar sëmundjen.
Ajo tha se ky veprim është i nevojshëm për ta penguar valën e 4 “shumë shqetësuese” të pandemisë, që po i stërngarkon spitalet.
“Shumë nga masat që tani janë të nevojshme nuk do të ishin të nevojshme, nëse më shumë njerëz do të ishin vaksinuar dhe nuk është shumë vonë për t’u vaksinuar tash”, tha kancelarja në largim.
Në vendet ku shkalla e hospitalizimeve kalon një nivel të caktuar, qasja në ngjarje publike, kulturore e sportive dhe hyrja në restorante do të lejohet vetëm për personat e vaksinuar dhe ata që e kanë kaluar Covid-in, shkruan Reuters.
Kancelarja Merkel tha se qeveria federale gjithashtu do të shqyrtojë një kërkesë të qeverive rajonale për miratimin e legjislacionit që u lejon të kërkojnë vaksinim të detyrueshëm për punëtorët e spitaleve dhe qendrave të kujdesit, transmeton Gazeta Express.
Saksonia, rajoni më i goditur nga vala e katërt, po e shqyrton mbylljen e teatrove, sallave të koncerteve dhe ndeshjeve të futbollit, raportoi gazeta “Bild”. Rajoni lindor gjerman e ka shkallën më të ulët të vaksinimit në vend.
