Hulumtimi më i ri i Universitetit në Londër ka treguar që fëmijët të cilët hanë më shumë “fast food” (ushqim i shpejtë) zhvillojnë koeficient më të vogël të inteligjencës sesa fëmijët që rregullisht hanë gjellë të zier të freskët.
Ushqimi i fëmijëve ka ndikim të madh në koeficientin e inteligjencës, madje edhe kur merren parasysh edhe të gjithë faktorët e tjerë të mundshëm, si inteligjenca në moshën e hershme dhe gjendja financiare e familjes..
Në hulumtim kanë marr pjesë 4.000 fëmijë skocezë në mes 3-5 vjeç, ndërsa janë krahasuar edhe efektet e “ushqimit të shpejtë” me efektet e ushqimeve të freskëta.
Mjekja Sophie von Stumm ka deklaruar që rezultatet janë të pritshme.
“Arsyeja e shëndoshë thotë që ushqimi të cilin e hamë do të ndikojë në zhvillimin e trurit, por hulumtimet e mëhershme kanë qenë të fokusuara në efektet e grupeve specifike të ushqimeve në vend se në llojet e ushqimit”, ka thënë ajo.
Ky hulumtim do të ndihmojë në ofrimin e dëshmive të forta në fushatat e ndryshme publike, qëllimi i të cilave është të reduktojnë sasinë e “ushqimit të shpejtë” të cilin e hanë fëmijët në Britani.
Von Stumm thekson që hulumtimi ka treguar që dallimet në ushqyerjen e fëmijëve në masë të madhe janë edhe problem shoqëror.
Nënat dhe etërit me të ardhura më të vogla shpesh kanë më pak kohë për përgatitjen e ushqimeve të freskëta për fëmijët e tyre. Ata fëmijë arrijnë rezultatet më të dobëta në testet e inteligjencës dhe shpesh kanë probleme në shkollë.
Rezultate të ngjashme ka dhënë edhe hulumtimi në Australi, i publikuar këtë vit, i cili ka treguar që fëmijët të cilët hanë “ushqim të shpejtë” mesatarisht kanë koeficient të inteligjencës 2 pikë më të ulët se moshatarët e tyre që hanë ushqim të shëndetshëm, transmeton IndeksOnline
Dhe hulumtimi i publikuar në SHBA, po ashtu ka treguar që fëmijët të cilët hanë pica dhe ushqim të fërguar para moshës 3-vjeçare kanë deri në 5 pikë koeficient më të ulët të inteligjencës se moshatarët e tyre që kanë ngrënë ushqim të zier me pemë dhe perime.
