Sot pasdite pritet të fillojë numërimi i votave të me postë në adresë të Komisionit Qendror të Zgjedhjeve, përcjell InLajmi.
Kështu ka bërë të ditur zëdhënësi i KQZ-së, Valmir Elezi, ditë më parë i cili theksoi se numri i zarfeve të individualizuara me fletëvotime që do të numërohen është 2.379.
Në bazë të listës së publikuar nga KQZ, numri më i madh i fletëvotimeve nga jashtë Kosovës i takojnë komunës së Junikut, 670 të tilla. Numërimi i këtyre fletëvotimeve do të thotë shumë për rezultatin e ngushtë ndërmjet 2 kandidatëve që garojnë për kryetarin e kësaj komune.
Në bazë të rezultateve preliminare të publikuara nga KQZ-ja, kandidati i LDK-së Ruzhdi Shehu (1.199) ka një epërsi prej 29 votash nga kandidati i AAK-së, Agron Kuçi (1.170).Edhe në Dragash rezultati është shumë i ngushtë.
Kandidati i PDK-së, Shaban Shabani (5.648) është në epërsi prej 47 votash në raport me kandidatin e LDK-së, Bexhet Xheladini (5,601)./InLajmi/
