4 shtetas të nacionalitetit rus janë ndaluar në regjionin e Leposaviqit të hënën me dyshimin se e kanë kaluar vendkalimin kufitar pa autorizim.
Në një përgjigje për Klankosova.tv Prokuroria Themelore në Mitrovicë ka konfirmuar se për 4 të ndaluarit është ngritur aktakuzë me urdhër ndëshkimor për shkak të veprës së lartcekur, si dhe është urdhëruar dëbimi i tyre nga Kosova.
Policia e Kosovës të hënën ka njoftuar se në fshatin Jelakce, Leposaviq, ka ndaluar një veturë të dyshuar e tipit Opel Astra, me targa të huaja BG ///-nn, në të cilën ndodheshin 4 persona, shtetas të huaj (rusë), të cilët përmes rrugëve alternative kishin hyrë ilegalisht në Republikën e Kosovës.
4 personat e ndaluar 2 meshkuj dhe 2 femra, të gjithë shtetas rusë, janë shoqëruar në Polici dhe ndaj tyre iniciohet rast për “kalim të paautorizuar të kufirit, ose vijës kufitare”.
