Autoritetet gjermane po shqyrtojnë masa më të rrepta kundër pandemisë për shkak të rritjes së numrit të rasteve. Në mesin e këtyre masave është që vaksinimi ose testimi të bëhen të detyrueshëm në transportin publik.
Gjermania të hënën regjistroi rekord të ri të rasteve, kur tubimet në mjediset e mbyllura për shkak të motit të ftohtë dhe fushatat e vaksinimit që nuk po zgjerohen po e shndërrojnë përsëri Evropën në epiqendër të pandemisë.
Tri partitë që po bisedojnë për koalicionin e ri qeveritar thanë të hënën se do t’i ashpërsojnë masat në draft-ligjin që po shqyrtohet nga Bundestagu për ta luftuar pandeminë.
Sipas një dokumenti të tri partive, të ashtuquajturat rregullat 3G, që kërkojnë test negativ për Covid-19, dëshmi të shërimit ose të vaksinimit, duhet të zbatohen në transportin publik dhe në vendet e punës.
“Për ta thyer shpejt e me forcë valën e katërt, ne jemi pajtuar për rregulla të mëtejme”, tha Kathrin Goering-Eckardt nga partia e të gjelbërve. Megjithatë, ajo tha se nuk ka marrëveshje për vaksinim të detyrueshëm në disa sektorë si shtëpitë e kujdesit, duke e theksuar përçarjen mes partisë së saj dhe SPD-së në njërën anë dhe FDP-së në anën tjetër, shkruan Reuters.
Propozimi për masa të reja në Gjermani erdhi në kohën kur Austria vendosi masa izoluese për personat e pavaksinuar, transmeton Gazeta Express.
Bundestagu pritet që të enjten ta votojë draft-ligjin e ri në mënyrë që ai të mund të hyjë në fuqi para kalimit të afatit të gjendjes emergjente më 25 nëntor, që ka ofruar bazë ligjore për masat e mëhershme kundër pandemisë.
