Në zgjedhjet lokale që u mbajtën në Kosovë, kandidatet shqiptare nuk arritën të marrin votat e mjaftueshme për të siguruar një mandat në krye të komunës.
Nga 10-të kandidate që ishin në garë, 9-të prej tyre u mposhtën në raundin e parë të zgjedhjeve, ndërsa vetëm një arriti të shkonte në balotazh, por që më pas u mposhtë nga kundërkandidati i saj.
Ardiana Qorraj, kandidate e Partisë Demokratike të Kosovës për kryetare të Deçanit, në zgjedhjet e 17 Tetorit kishte fituar vetëm 298 vota.
Arbenesha Kuçi po ashtu kandidate e Partisë Demokratike të Kosovës për kryetare të Gjakovës, kishte marrë vetëm 1.377 vota.
Pak vota kishte arritur të siguronte edhe kandidatja e Aleancës për Ardhmërinë e Kosovës, Arta Ahmeti- Xhylani, më 17 Tetor ajo në Drenas fitoi vetëm 411 vota.
Në zgjedhjet e 17 Tetorit, vota të mjaftueshme nuk arriti të siguronte as Anduena Gllareva nga Lidhja Demokratike e Kosovës, e cila si kandidate për për kryetare të Drenas mori besimin e vetëm 219 qytetarëve.
Kurse, Leonora Morina Bunjaku, kandidatja e Partisë Demokratike të Kosovës për kryetare të Gjilanit, në zgjedhjet lokale mori 3.518 vota.
Në garë për kryetare të Dragashit ishte edhe Kaltrina Salihu nga Lëvizja Vetëvendosje, e cila kishte arritur të grumbullonte vetëm 2.375 vota.
Pak e votuan edhe Drena Podrimçakun, e cila nga Partia Balliste kandidoi për kryetare të Pejës, ajo u votua vetëm nga 89 qytetarë.
Ndërsa, Floretë Zejnullahu nga Partia Demokratike e Kosovës, në Podujevë kishte fituar 2.471 vota.
Në garë për të fituar udhëheqjen e komunës ishte edhe Sibel Halimi nga Lidhja Demokratike e Kosovës, e cila në Ferizaj u votua nga 4.585 qytetarë.
E vetmja kandidate grua që arriti të shkonte në balotazh ishte Mimoza Kusari Lila nga Lëvizja Vetëvendosje. Në garën për Gjakovë, ajo u mposhtë nga kandidati i Aleancës për Ardhmërinë e Kosovës, Ardian Gjini.
Kusari – Lila sipas rezultateve preliminare të Komisionit Qendror të Zgjedhjeve ka marrë 18.873 vota.
Kurse, Ardian Gjini nga AAK, ka fituar 20.254 vota.
Ndërsa në komunat me shumice serbë tashmë mandatin e kryetares e kanë fituar Lilana Shubariq dhe Katarina Ristiq. Që të dyja i përkasin subjektit politik Lista Serbe.
Lilana Shubariq do të udhëheq komunën e Graçanicës, kurse Katarina Ristiq komunën e Ranillugës.
Ndryshe, në raundin e parë të zgjedhjeve lokale 17 komuna kanë zgjedhur kryetarin, kurse 21 tjera kishin shkuar në balotazh më 14 nëntor.
Sipas rezultateve preliminare të KQZ-së, në raundin e dytë të zgjedhjeve, LVV ka fituar në katër komuna, aq sa kanë fituar edhe PDK e LDK, derisa AAK ka fituar në tri komuna, përcjell Telegrafi.
Në raundin e 2-të të zgjedhjeve të drejtë vote kishin 1.260.571 qytetarë.
