Të premten në mbrëmje pati protesta të tensionuara në Hagë të Holandës, pasi Kryeministri Mark Rutte njoftoi për masat e reja kundër pandemisë.
Policia përdori ujë kundër qindra protestuesve që hidhnin fishekzjarrë, të grumbulluar para Ministrisë së Drejtësisë dhe Sigurisë, gjatë kohës kur Rutte po mbante konferencë për gazetarë.
Rreth 200 protestues hodhën gurë dhe fishekzjarrë në drejtim të policëve dhe vendosën barrikada, sipas agjencisë së lajmeve, “AFP”.
Policia përdori ujë për t’i shpërndarë protestuesit, ndërsa këta të fundit bënin zhurmë e brohoritje nëpër qendrën e qytetit.
Masat e reja në Holandë, ku përfshihen së paku tri javë me kufizime në restorante, dyqane e ngjarje sportive, janë izolimi i parë i pjesshëm dimëror në Evropën Perëndimore, shkruan The Guardian.
Nga e shtuna, restorantet, kafenetë e dyqanet do të duhet që të mbyllen në orën 20:00 për tri javët e ardhshme, ndërsa dyqanet e cilësuara si joesenciale duhet të mbyllen në orën 18:00, transmeton Gazeta Express.
Njerëzve do t’u kufizohet numri i mysafirëve në shtëpi në katër persona dhe janë këshilluar që të punojnë nga shtëpia, përpos në rastet kur është e domosdoshme prania në vendin e punës. Megjithatë, shkollat nuk do të mbyllen dhe nuk do të ketë orë policore.
