Si rezultat i përpjekjeve për të rritur furnizimin pas krizës energjetike në Kinë në shtator, prodhimi ditor i qymyrit kaloi në mbi 12 milionë tonë, duke arritur një nivel rekord.
Komisioni Kombëtar i Zhvillimit dhe Reformës (NDRC), organi i planifikimit ekonomik të Kinës, njoftoi se prodhimi i qymyrit arriti në 12 milionë e 50 mijë tonë më 10 nëntor. Sasia në fjalë është “prodhimi ditor më i lartë i regjistruar ndonjëherë”.
Me rritjen e çmimeve globale, Kina po përpiqet të zbusë problemin e prodhimit të energjisë me bazë qymyri duke rritur furnizimin dhe stoqet.
NDRC kishte njoftuar më parë se prodhimi i qymyrit ishte rritur që nga mesi i tetorit dhe theu një rekord me 11 milionë e 930 mijë tonë në ditë më 8 nëntor. Në njoftim thuhet se stoqet e qymyrit kanë arritur në 117 milionë tonë më 6 nëntor, që është 40 milionë tonë më shumë se stoqet në fund të shtatorit.
– Ndërprerja e energjisë elektrike në 20 nga 31 provinca dhe territore
Në Kinë, 56 për qind e prodhimit të energjisë elektrike vjen nga termocentralet me qymyr. Për shkak të rritjes së çmimeve globale të qymyrit, ekzistojnë probleme në furnizim dhe në prodhimin e energjisë elektrike në vend.
Prodhuesve iu desh të ndalonin furnizimin me energji elektrike për shkak të rritjes së kostove hyrëse në masë dëmtuese, gjë që rezultoi në ndërprerje të kohëpaskohshme të energjisë në shtator në 20 nga 31 provincat dhe territoret në pjesën kontinentale të Kinës.
Në provincat verilindore, ku energjia elektrike shtëpiake furnizohet kryesisht nga termocentralet me qymyr, shumë qytete përjetuan ndërprerje të paplanifikuara të energjisë. Furnizimi me energji elektrike me ndërprerje në shumë fabrika dhe punishte në provincat qendrore, jugore dhe lindore shkaktoi probleme në prodhim, , transmeton Anadolu Agency (AA).
Për shkak të ndërprerjeve, kompanitë e mëdha botërore si Apple dhe Tesla, si dhe shumë ndërmarrje të vogla dhe të mesme që kanë një rol të rëndësishëm në zinxhirët globalë të prodhimit, u desh të ndalonin prodhimin.
