Analisti politik, Rrahman Paçarizi, ka thënë që nuk ka mbetur edhe shumë kohë për të parë ndonjë ndryshim të madh tek kandidatët deri në ditën e balotazhit që do të mbahet më 14 nëntor.
“Kemi parë një aktivitet intensiv të partive politike dhe të kandidatëve përkatës, të cilën unë e çmoj dhe është pozitive që janë angazhuar kaq fort edhe kandidatët edhe mbështetësit e tyre nga partitë përkatëse politike, sepse mendoj që ata e shohin këtë garë dhe këtë luftë si gatishmëri për me marr përgjegjësi dhe nuk e shoh patjetër si një përpjekje për të marrë pushtet”.
Paçarizi, ka thënë që tash kandidatët dhe partitë politike po i duken më të gatshëm për të marrë përgjegjësi.
“Tash partitë politike dhe kandidatët po më duket se janë më të vetëdijësuar dhe më të gatshëm për t’i marrë ato përgjegjësi. Se a do të ndodhë kështu në 3 ditët e ardhshme, varet edhe nga ajo nëse do të arrijnë të bëjnë koalicione. Mendoj që kanë dështuar me bo koalicione të hapura. Sikur të kishin bo koalicione të hapura deri tash kjo do t’i jepte kuptim dhe dimension të ri balotazhit”.
Tutje Paçarizi ka theksuar që nuk i beson shumë koalicioneve por që i beson “frymës qytetare që don me bo diçka të caktuar, shkruan KlanKosova.tv
“Loja është e hapur dhe janë në garë të gjithë kandidatët. E shoh Prishtinën, Prizrenin shumë interesant gjithashtu edhe Gjakovën. Rezultatet mund të ndërrojnë gjithkund, e kemi Podujevën dhe Gjilanin në të cilin e shoh një përballje kualitative – Haziri që ka qenë i pakontestueshëm dhe këtë herë e kemi një kandidat të jashtëzakonshëm të VV-së Hysenin që ka qenë i saktë dhe karizamatik”.