Shtetet e rajonit kanë filluar administrimin e dozës së 3 të vaksinës anti-Covid. Në Kosovë sipas njohësve shihet si i nevojshëm miratimi për dozën plotësuese për luftimin e pandemisë.
Vaksinimi kundër Covid-19 është i domosdoshëm në luftimin e këtij virusi. Në pjesën më të madhe të botës dozat e para dhe të 2-ta janë administruar dhe është filluar me dozën e 3.
Sipas njohësve të kësaj fushe Kosova nuk bën përjashtim me nevojën e administrimit të dozës së 3.
“Padyshim që edhe në Kosovë është e domosdoshme, sa më shpejt që është e mundshme dhe që të merret vendimi për lejimin e dozës së 3 për të gjithë ata që kanë kaluar më shumë se 6 muaj nga doza e 2 do të jetë e mirëseardhur. Le të vaksinohen që të gjithë, varësisht prej moshës, gjendjes shëndetësore të tyre. Në mënyrë paralele edhe me ata që nuk janë vaksinuar deri tash apo ata që deri tani janë vaksinuar me një dozë”, thotë për RTK-në infektologu Ilir Tolaj.
Ndryshe, në Kosovë që nga fundit i muajit mars ka filluar imunizimi dhe janë vaksinuar 1.6 milionë doza dhe rreth 720 mijë të vaksinuar me të 2 dozat.
Izraeli, Gjermania, Franca e vendet e tjera kanë disa muaj që kanë filluar me dozën e 3 ndërsa Shqipëria, Maqedonia e Veriut e Serbia së fundi kanë lejuar filimin e dozës së 3 të vaksinës kundër Covid-19.
