Policia e Kosovës ka njoftuar se janë arrestuar 5 persona në Prizren, të cilët kanë shpërndarë para të falsifikuara, përcjell InLajmi.
Sipas policisë, këta persona me profesion ishin kamarierë.
“Me datë 02.11.2021, Hetuesit e NJRHKEK në Prizren, pas një mori veprimesh hetimore në bashkërendim të plotë me Prokurorinë Themelore në Prizren, si dhe me urdhër verbal nga Gjyqtari i Procedurës Paraprake, kanë bërë kontrollin e katër personave të dyshuar si dhe kanë kryer kontrollin e shtëpisë së personit të 5-të të dyshuar, si i dyshuari kryesor i rastit”, thuhet në njoftim.
Më pas, në njoftim thuhet se gjatë kontrolleve të realizuara ndaj personave të dyshuar, janë siguruar prova të mjaftueshme që mbështesin dyshimin se, të 5 personat kanë shpërndarë para metalike prej 2 euro të falsifikuara.
“Në cilësinë e provave materiale janë sekuestruar 195 monedha metalike nga 2 euro (të dyshuara si të falsifikuara) dhe pesë telefona mobilë të dyshuarve”.
“Bazuar në dëshmitë dhe të gjeturat, të njëjtit dyshohet se janë kryerës potencial të kësaj vepre, ku vetëm gjatë muajit Tetor 2021, kanë shkëmbyer herën e parë 300 euro origjinal të fituara për 400 euro false, që i kanë shpërndarë, herën e 2-të 200 euro origjinal për 300 euro false, si dhe herën e 3-të 400 euro origjinal për 550 euro false. Të 5 të dyshuarit në bashkëpunim, me qëllim të përfitimit material, kanë shpërndarë para të falsifikuara dhe paratë origjinale të fituara nga vepra penale “Falsifikim i parasë”, i kanë ndarë në pjesë të barabarta, në 5 pjesë”, thuhet në njoftim./InLajmi/
