Kryeministri i vendit, Albin Kurti, në konferencën dhe ekspozitën e 9-të të përbashkët ballkanike, për vlerën e ujit, ka thënë se vendi ynë nuk mund të jetë imun ndaj krizës mjedisore, përcjell InLajmi.
Për këtë arsye Kurti tha se është e domosdoshme ta sigurojmë menaxhimin e mirë të burimeve tona ujore.
“Vendi ynë nuk mund të jetë imun ndaj krizës mjedisore, prandaj është e domosdoshme, që t’i mbrojmë dhe t’u sigurojmë menaxhimin e mirë burimeve tona ujore, të ndërtojmë akumulime të reja dhe të sigurojmë ujë për zhvillim ekonomik për brezat e ardhshëm”, tha kryeministri Kurti.
Kurti tha se nevojitet një shikim i thellë i qasjes sonë ndaj shfrytëzimit të ujit e burimeve tona.
“Nevojitet një rishikim i thellë i qasjes sonë ndaj shfrytëzimit të ujit, ajrit, pyjeve, mjedisit e burimeve tona, me një rimendim të hapësirës publike duke u bazuar në parim të drejtësisë sociale dhe jetës së dinjitetshme” , tha kryeministri Kurti.
Më pas, Kurti tha qasja në ujësjellës publik, deri në fund të vitit 2022 do ta arrijë shifrën 83%, nga 79% sa është aktualisht.
“Në Republikën tonë janë 7 Kompani Rajonale të Ujësjellësve (KRU), që menaxhojnë dhe shpërndajnë ujin për qytetarët. Qasja në ujësjellës publik, të menaxhuara nga Kompanitë Rajonale të Ujësjellësve deri në fund të vitit 2022 do ta arrijë shifrën 83%, nga 79% sa është aktualisht”,tha Kurti./InLajmi/
