Mbretëresha Elizabetë u ka kërkuar liderëve botërorë në samitin e klimës, COP26, që të krijojnë një të ardhme më të sigurt dhe më të qëndrueshme për planetin.
“Në ditët në vijim, bota ka mundësinë të bashkohet në objektivin e përbashkët për të krijuar një të ardhme më të sigurt, më të qëndrueshme për njerëzit tanë dhe për planetin nga i cili varemi. Askush nga ne nuk i nënvlerëson sfidat përpara, por historia ka treguar se kur kombet bashkohen në kauzë të përbashkët, ka gjithmonë vend për shpresë”, ka thënë mbretëresha në një video-mesazh, pasi nuk kishte mundësi të ishte e pranishme fizikisht në këtë samit.
“Koha për fjalë tani ka kaluar, është koha e veprimit”, ka shtuar mbretëresha.
“Është shpresa e shumë njerëzve që trashëgimia e këtij samiti, e shkruar në librat e historisë, do t’ju përshkruajë si liderët që nuk e humbën mundësinë dhe që iu përgjigjën thirrjes së atyre brezave të ardhshëm”, ka shtuar ajo.
Sipas saj, asnjëri nuk do të jetojë përgjithmonë por këtë duhet ta bëjnë për brezat e ardhshëm.
“Asnjëri prej nesh nuk do të jetojmë përgjithmonë. Por ne nuk po e bëjmë këtë për veten tonë, por për fëmijët tanë dhe fëmijët e fëmijëve tanë, dhe ata që do të ndjekin gjurmët e tyre”, ka vazhduar mbretëresha.
Mbretëresha tha se ishte krenare për burrin e saj të ndjerë, Princin Philip, dhe anëtarët e tjerë të familjes për inkurajimin e mbrojtjes së mjedisit.
Ajo kujtoi paralajmërimin e Dukës së Edinburgut në një mbledhje akademike të vitit 1969, në të cilën ai foli për rreziqet e dështimit për të trajtuar ndotjen.
“Është një burim krenarie për mua që roli kryesor të cilin burri im luajti në inkurajimin e njerëzve për të mbrojtur planetin tonë të brishtë, jeton përmes punës së djalit tonë të madh Charles dhe djalit të tij të madh William. Nuk mund të isha më krenarë për ta”, ka shtuar ajo, transmeton Klankosova.tv
Mbretëresha Elizabetë ishte planifikuar të merrte pjesë në konferencën e Kombeve të Bashkuara në Glasgow, por për shkaqe shëndetësore u këshillua të pushonte.
