Presidenti amerikan Joe Biden dhe bashkëshortja e tij mbërritën në Itali, teksa kreu i Shtëpisë së Bardhë do të takohet me Papa Françeskun në Vatikan dhe më pas do të marrë pjesë në samitin e G20 që zhvillohet në Romë.
Biden do të udhëtojë më tej në Skoci për të qenë prezent në konferencën e klimës. Gjatë udhëtimit të dytë në Evropë, presidenti amerikan pritet që të risjellë sinjalin e bashkëpunimit më të fortë mes palëve, pas 4 viteve të trazuara me presidencën e Donald Trump.
Çmimet e energjisë, programi bërthamor i Iranit dhe siguria pritet të jenë çështjet kryesore të takimeve. Bie në sy mungesa e liderëve të Kinës e Rusisë.
Një përparësi kryesore do të jetë mënyra se si të reduktohen pabarazitë e shkaktuara nga pandemia Covid-19 dhe si të përshpejtohet rimëkëmbja ekonomike globale, transmeton Euronews.
Italia shpreson që liderët botërorë do të vendosin një afat të përbashkët për të arritur emetimet neto zero të gazrave serë.
