Kandidati i LVV për kryetar të Podujevës Shpejtim Bulliqi ka folur për rezultatin zgjedhor të tij në zgjedhjet lokale të këtij viti.
Billiqi në “Debat Plus” në RTV Dukagjini ka thënë se gara e këtij viti dallon nga gara e nëntorit të vitit të kaluar.
“Në nëntor kemi qenë vetëm tre kandidatë dhe njëri e ka ditur që nuk ka asnjë gjasë për t’u bërë kryetarë. Tjetri problem pse nuk arrita të fitoj pa balotazh është se në këto zgjedhje ka pasur edhe garë për asamble. Ju e dini mirë që gara për asambleistë i komplikon bukur shumë situatat. Lidhjet farefisnore dhe numri i madh i kandidatëve shpesh e shpërndajnë shumë votën”, tha ai.
Bulliqi thotë se megjithatë ka mundur të ndikojë edhe periudha e shkurtër në qeverisje që nuk ka mundur të bëjë ndonjë mrekulli.
“Nuk ka asnjë fakt se dikush në këta 10 muaj dikush nga qeverisja ime ta ketë keqpërdoruar ndonjë euro”.
Kryetari aktual i Podujevës thotë se kundërkandidati i tij nga LDK-ja, Ekrem Hyseni ka bërë një fushatë të pistë ndaj tij.
“Në ditën e heshtjes zgjedhore njerëzve u janë dërguar fotografi të montuara që dëmtojnë atë”.
Bulliqi thotë se personat që merren me këto foto janë njerëz të strukturave të LDK-së që sipas tij tashmë janë adresuar në organe të drejtësisë.
