Rusia raportoi numër rekord të rasteve të COVID-19, me 37.930 persona që rezultuan pozitivë gjatë ditës së kaluar, duke e çuar numrin e përgjithshëm të rasteve në 8,27 milionë
Në raportin ditor të institucioneve kompetente thuhet se rastet aktive aktualisht janë 861.293.
Gjatë 24 orëve të fundit u regjistruan 1.069 raste të vdekjeve, duke e rritur numrin e përgjithshëm të viktimave në 231.669.
Gjithashtu, 20.690 fituan betejën kundër virusit gjatë ditës së kaluar, duke e çuar në 7,18 milionë numrin e përgjithshëm të të shëruarve.
Duke filluar nga 28 tetori, Rusia do të ketë një periudhë kombëtare 10-ditore jo-pune që synon të frenojë përhapjen e virusit.
Gjithashtu, presidenti rus Vladimir Putin nënshkroi një dekret që rekomandonte autoritetet rajonale të kufizonin punën e restoranteve dhe të ndalonin ngjarjet masive argëtuese nga ora 23:00 deri në 06:00 të mëngjesit.
Në dekret thuhet se vendimi përfundimtar për zbatimin e masave u delegohet krerëve të qarqeve.
Putin rekomandoi gjithashtu shtimin e testeve për COVID-19 dhe vaksinimin kundër virusit.
Ai gjithashtu këshilloi t’u sigurohen dy ditë pushim me pagesë punonjësve që marrin vaksinat, transmeton Anadolu Agency (AA).
Putin udhëzoi Ministrinë e Shëndetësisë të dërgojë ekipe shtesë mjekësore në rajonet më të goditura si dhe Ministrinë e Emergjencave për të ndihmuar autoritetet lokale në luftën kundër COVID-19.
