Ish-kryetarja e KQZ-së, Valdete Daka, ka thënë që zgjedhjet e 17 Tetorit janë organizuar mirë dhe se nuk ka parë ndryshime nga proceset e mëhershme zgjedhore.
Daka në Rubikon në Klan Kosova, theksoi që pas 11 vitesh në krye të Komisionit Qendror të Zgjedhjeve (KQZ), kësaj radhe e pati rastin që të votonte si qytetare e thjeshtë.
“Ka qenë pak e çuditshme që të dielën e 17 Tetorit, nuk jam zgjuar si zakonisht kur kanë qenë zgjedhjet dhe kam votuar në orën 07:00 dhe pastaj ka qenë ditë e gjatë për mua. Këtë herë ka qenë më ndryshe, pasi kam votuar si të gjithë qytetarët e Kosovës, pra kam qenë një votues i thjeshtë”.
Tutje Daka ka thënë që ka qenë një proces i shkëlqyeshëm zgjedhor dhe sipas saj çdo gjë ka qenë e organizuar ashtu siç tash e sa vite organizohen zgjedhjet.
“Rezultatet kanë dalë shumë shpejt që është për t’u lavdëruar. Organet e shëndetësisë na kanë rekomanduar që t’i përmbahemi udhëzuesit për masat anti-Covid. Zgjedhjet e Podujevës janë shtyrë për shkak të pandemisë, pastaj në rrethana të pandemisë janë mbajtur zgjedhjet e 14 Shkurtit ku janë zbatuar masat e kërkuara”.
Sipas Dakës meqë zgjedhjet janë mbajtur dy herë në rrethana të pandemisë “nuk kanë pasë pse mu shty zgjedhjet e 17 Tetorit, pasi rrethanat kanë qenë pothuajse të njëjta me ato të 14 Shkurtit”.
