Rrjeti i Grave të Kosovës ka reaguar pasi i akuzuari për dhunim të vajzës 15-vjeçare nga Gjakova, është dënuar vetëm me 8 muaj burgim, përcjell InLajmi.
Sipas RRGK-së, për këtë vendim Gjykata ka përdorur arsyetime të papranueshme dhe skandaloze, duke thënë se viktima nuk kishe pësuar lëndime dhe se i akuzuari ishte sjellur në mënyrë korrekte.
“Në këtë vendim, gjykata ka përdorur arsyetime të papranueshme e skandaloze, siç janë arsyetimet se “viktima nuk kishte pësuar lëndime”, dhe se “i akuzuari kishte sjellje korrekte”. Arsyetime të tilla veçse vërtetojnë se viktima nuk ka qenë prioritet për Gjykatën Themelore në Pejë”, thuhet në reagim.
Tutje RRGK ka kërkuar nga Prokuroria Themelore në Pejë, që ta sqarojnë nëse kanë ankimuar kundër këtij vendimi në Gjykatën e Apelit.
“Andaj, përmes kësaj kumtese, RrGK kërkon nga Prokuroria Themelore në Pejë që të sqarojnë se a kanë ankimuar kundër këtij vendimi në Gjykatën e Apelit. Kjo duke kujtuar se Prokuroria Themelore është përgjegjëse për trajtimin e këtyre rasteve duke i mbrojtur viktimat e duke i përcjell rastet deri në fund, e jo vetëm duke e dërguar aktakuzën. RRGK përsërit thirrjen ndaj institucioneve përgjegjëse të drejtësisë si Gjykatat, Prokuroria, dhe Policia e Kosovës, që t’i trajtojnë me priroritet rastet e dhunës ndaj grave dhe vajzave, duke pasur gjithnjë në qendër qasjen e bazuar në viktimën”, thuhet në reagim./InLajmi/
