Hani i Elezit do të ketë rivotim për zgjedhjet lokale.
Kjo pasi një ditë pas zgjedhjeve kandidati i pavarur për kryetar të kësaj komune, Rufki Suma, u ankua në Panelin Zgjedhor për Ankesa dhe Parashtresa se kishte pasur parregullsi në votim.
Sipas tij, kanë qenë simpatizantët e Partisë Demokratike të Kosovës që kanë bërë presion mbi qytetarët të dielën tek kutitë e votimit.
Për këtë shkas, PZAP-ja ka urdhëruar Komisionin Qendror të Zgjedhjeve që ta përsërisë votimin për kryetar të kësaj komune.
“Urdhërohet Komisioni Qendror i Zgjedhjeve, me seli në Prishtinë, ta përsërisë votimin vetëm për kryetar komune në Qendrat e Votimit, nr. 3301d, 3302d, 3303d dhe 3304d, të gjitha në Komunën e Hanit të Elezit”.
Por, ankesa e bërë nga Suma u kundërshtua nga radhët e PDK-së: “Lidhur me pretendimet tjera se kandidati Mehmet Ballazhi ka vizituar tri qendra të votimit dhe ka bërë presion ndaj votuesve, janë të pasakta, për arsye se i njëjti në cilësinë e kryetarit të degës ka inkurajuar vëzhguesit të respektojnë rendin dhe ligjin dhe të kontribuojnë në mbarëvajtjen e procesit”.
Vendimin e PZAP-së tashmë po e mirëpret Suma, përcjell Klan Kosova.
Një kërkesë e tillë i është refuzuar kandidatit për kryetar të Komunës së Skenderajt, Bekim Jashari. Në këtë rast PZAP ka vlerësuar se pretendimet që në ditën e votimit në disa qendra ka pasur presion për ta votuar PDK-në – janë të paqëndrueshme.
