KQZ njofton se të enjten do të dihet nëse do të ketë nevojë të bëhet rinumërimi i ndonjë vendvotimi të Zgjedhjeve Lokale të cilat u mbajtën më 17 Tetor, përcjell InLajmi.
Zëdhënësi i KQZ-së, Valmir Elezi në një konferencë nga Qendra e Numërimit dhe Rezultateve ka njoftuar gjithashtu edhe për aktivitetet që janë duke u zhvilluar në këtë qendër.
“Në Qendrën e Numërimit dhe të Rezultateve është duke vazhduar puna në 3 ndërrime, me qëllim të arritjes së afateve ligjore, për raundin e 2 të Zgjedhjeve për Kryetarë të Komunave, i cili duhet të mbahet 4 javë pas ditës së zgjedhjeve, pra më 14 Nëntor. Të enjten, KQZ-ja do të mbajë mbledhjen e radhës për të shqyrtuar raportin që del nga QNR-ja pas përfundimit të procesit të hetimit dhe verifikimit të atyre vendvotimeve, të cilat nuk kanë mundur të procedohen si të rregullta, pasi është vërejtur ndonjë parregullsi e çfarëdo natyre. Pas rekomandimit nga QNR, KQZ-ja do të vendos nëse është e nevojshme të bëhet rinumërimi i ndonjë vendvotimi, me qëllim të saktësimit të gjendjes brenda një kutie votimi”, tha Elezi.
Tutje Elezi ka njoftuar edhe për formularët e plotësuar në vendvotime ku çdo kandidat i interesuar mund t’i shfletojë për ta parë rezultatin që ka arritur në çdo vendvotim.
“Si procedurë, këta formularë, skanohen në Qendrën e Numërimit dhe Rezultateve dhe pastaj ngarkohen në web faqen e KQZ-së. Formularët e publikuar janë kopje e formularëve të plotësuar në vendvotime dhe çdo kandidat i interesuar mund t’i shfletojë për ta parë rezultatin që ka arritur në çdo vendvotim. Ky publikim është në proces e sipër dhe duhet ta sqarojmë se kjo nuk është një shpallje e rezultateve përfundimtare, por bëhet me qëllim të rritjes së transparencës në procesin zgjedhor dhe për t’i ndihmuar kandidatët që të shohin formularët përmes telefonit të tyre”, tha Elezi.
Ndërsa sa i përket ankesave që janë parashtruar në këtë institucion, KQZ-ja është në pritje të vendimmarrjes nga PZAP.
“KQZ-ja është në pritje të vendimmarrjes nga Paneli Zgjedhor për Ankesa dhe Parashtresa lidhur me ankesat që janë parashtruar në këtë institucion. Siç e dini, afati ligjor për vendosjen lidhur me këto ankesa përfundon të enjten”, tha ai./InLajmi/
