Këshilli i Sigurimit i Kombeve të Bashkuara do të shqyrtojë sot raportin e rregullt gjashtëmujor të sekretarit të Përgjithshëm të OKB-së Antonio Guterres mbi situatën në Kosovë, që i referohet periudhës nga 16 Marsi deri më 15 Shtator.
Kosova do të përfaqësohet në këtë takim nga presidentja Vjosa Osmani e cila udhëtoi të mërkurën për New York, ndërsa Serbia nga ministri i Punëve të Jashtme, Nikola Selakoviq.
Në raportin mbi situatën në Kosovë, shefi i OKB-së përshëndeti rifillimin e dialogut Kosovë-Serbi, me ndërmjetësimin e Bashkimit Evropian.
Gjithashtu i është bërë thirrje të gjitha intitucioneve, në bashkëpunim me organizatat e shoqërisë civile dhe komunitetin lokal, që të sigurojnë një mjedis të përshtatshëm për kthimin e sigurt, dinjitoz dhe të qëndrueshëm të të gjithë PZHBV -ve dhe të kthyerve, dhe riintegrimin e tyre në shoqërinë kosovare.
Raporti gjithashtu flet për rastin ndaj Ivan Todosijeviqit, që u dënua me dy vjet burgim për “nxitje të urrejtjes kombëtare, racore, fetare ose etnike” për deklarata mbi “Masakrën e Reçakut”, shkruan Klan Kosova.
Këshilli i Sigurimit të OKB –së për Kosovën u mblodh për herë të fundit në prill të këtij viti online, për shkak të pandemisë së COVID-19.
