Ish-deputeti i Vetëvendosjes, Driton Çaushi u dënua me 1 vit e 2 muaj burgim me kusht për akuzat se ka hedhur gaz lotsjellës në Kuvend dhe ka penguar në kryerjen e detyrave zyrtare kryetarin e Kuvendit dhe deputetët.
Lajmin e ka konfirmuar për Telegrafin, zëdhënësja e Gjykatës Themelore të Prishtinës, Mirlinda Gashi.
Gashi ka bërë të ditur se dënimi unik është në kohëzgjatje prej 1 vit e 2 muaj burgim me kusht, në afat verifikimi prej 2 vitesh.
Të akuzuarit do t’i llogaritet edhe koha e kaluar në arrest shtëpiak nga 9 gushti e deri më 8 shtator 2016.
Ndryshe, Prokuroria Themelore në Prishtinë më 27 mars 2018 kishte ngritur aktakuzë kundër Driton Çaushit. Sipas aktakuzës më 10 gusht 2016 gjatë seancës së Kuvendit të Republikës së Kosovës, ku ka qenë pjesëmarrës i akuzuari, në cilësinë e deputetit të Lëvizjes Vetëvendosje, kishte hedhur gazin lotsjellës në këtë sallë.
Me këto veprime, thuhet se i njëjti ka kryer veprën penale “përdorim i armës apo mjetit të rrezikshëm” nga neni 375, paragrafi 1 të Kodit Penal, vepër e cila dënohet me burgim prej një deri në tetë vjet.
Sipas aktakuzës, Çaushi gjithashtu kishte kryer edhe veprën penale “pengimi i personit zyrtar gjatë kryerjes së detyrave zyrtare” nga neni 409, paragrafi 1 të Kodit Penal, vepër e cila dënohet me burgim prej 3 muaj deri në 3 vjet.
