Kryeministri Albin Kurti, ia ka hapur sot derën e zyrës së tij në Qeveri shefit të UNMIK-ut, Zahir Tanin, duke e pritur në takim. Në vitin 2006, Kurti me shokë i kishin bllokuar hyrjet e selisë së UNMIK-ut, duke kërkuar që ky mision ndërkombëtar të largohej nga Kosova. Krerët e UNMIK-u për Kurtin ishin urdhërdhënësit e vrasjeve të dy aktivistëve të Lëvizjes Vetëvendosje gjatë protestave të dhunshme në shkurt të vitit 2007.
Nga rruga, që prej kur nisi ta zhvillojë angazhimin e tij politik, Albin Kurti kërkoi largimin e UNMIK-ut nga Kosova. Për të, UNMIK-u ishte strukturë autoritare. Por, për Kurtin kryeministër, UNMIK është autoritet me të cilin bashkëpunon.
Qysh në vitin 2004, Kurti i kishte mbledhur disa qytetarë për të protestuar në Prishtinë kundër UNMIK-ut. Besonte se kundërshtimi do të vazhdonte deri kur UNMIK-u ta linte Kosovën.
“Është pesë vjetori i Rezolutës 1244 dhe nuk dëshironim të lejojmë që kjo ditë të kalojë duke festuar institucionet tona me UNMIK-un. Kosova është duke shkuar në procese negative në çdo aspekt, social, ekonomik dhe politik. Prandaj, ne simbolikisht filluam lëvizjen tonë joviolente, e cila do të vazhdojë deri në realizimin e kërkesave tona, statusin e qytetarit dhe në të njëjtën kohë datën sa më të shpejtë kur UNMIK-u do të dalë nga Kosova”, kishte thënë Kurti më 10 qershor 2004, atëherë si kryetar i Rrjetit të Aksionit për Kosovën.
Për çdo vit, UNMIK-u u bë armik edhe më i madh për Albin Kurtin dhe Lëvizjen e tij. Dy vjet pas, më 9 qershor të 2006-ës, Kurti me shokë i kishin bllokuar hyrjet e selisë së UNMIK-ut, në një aksion ku ishin arrestuar dhjetëra aktivistë. Kurti paralajmëronte se nuk do të ndashin.
Derisa konfrontimi i Kurtit me UNMIK-un bëheshin gjithnjë e më agresive, më 10 shkurt 2007, një protestë e dhunshme kundër pakos për statusin e Kosovës që kryenegociatori ndërkombëtar Martti Ahtisaari e pati dorëzuar në Prishtinë dhe në Beograd paraprakisht, ishte fatale për Mon Balajn dhe Arben Xheladinin, dy aktivistë të Lëvizjes Vetëvendosje, të cilët vdiqën nga plumbat e gomës. Më shumë se 80 të tjerë kishin mbetur lënduar, katër prej të cilëve rëndë, si dhe 15 ishin arrestuar gjatë kësaj proteste që kishte eskaluar në përleshje të dhunshme ndërmjet protestuesve dhe policisë në qendër të Prishtinës.
Policia kishte ndërhyrë me gaz lotsjellës për të shpërndarë mijëra protestues, anëtarë dhe simpatizantë të Lëvizjes Vetëvendosje, të cilët kishin tentuar të çanin kordonin e Policisë së Kosovës dhe policisë së UNMIK-ut, që ishte vendosur në afërsi të ndërtesave të Qeverisë dhe Kuvendit të Kosovës.
Fillimisht protestuesit ishin nisur nga selia e Vetëvendosjes dhe të prirë nga lideri i tyre Albin Kurti kishin marshuar nëpër qendër të kryeqytetit, ku të ndeshur me forcat e shumta të policisë speciale kishin brohoritur kundër UNMIK-ut.
Protesta tragjike u pasua me dy dorëheqje, atë të ministrit të atëhershëm Punëve të Brendshme, Fatmir Rexhepi, dhe komisionerit të policisë së UNMIK-ut, Stephen Curtis. Ky i fundit, tri ditë pas protestës, bashkë me zëvendës-shefin e atëhershëm të UNMIK-ut, Steven Shook, kishin premtuar një hetim gjithëpërfshirës për rrethanat e vrasjeve, si dhe një hetim lidhur me aktivitetet e Lëvizjes Vetëvendosje, ndërkohë që lideri i saj, Albin Kurti po atë ditë pritej të paraqitjej për herë të parë para gjykatës, pasi ishte arrestuar dhe po mbahej në paraburgim.
Për këtë bilanc tragjik, Kurti e akuzoi UNMIK-un, fajësi kjo, që sipas tij, u dëshmua edhe me ikjen e kontingjentit policor rumun nga Kosova. Ngjarjet e 10 shkurtit 2008, sipas tij, ishin një skenar i paramenduar i UNMIK-ut, që kishte si qëllim shtypjen e nismave dhe kërkesave të shqiptarëve të Kosovës për vetëvendosje.
Një vit pas asaj proteste, Kurti thoshte se UNMIK-u po e fshihte të vërtetën, duke i akuzuar krerët e këtij misioni të OKB-së si urdhërdhënës të vrasjeve.
“Nuk mund të thuhet se sistemi i drejtësisë ka dështuar, për shkak se ai as që ka provuar e as që ka tentuar të zbatojë drejtësi për demonstratën e 10 shkurtit. UNMIK-u nuk do që të zbardhet e vërteta, sepse do të zbuloheshin edhe krerët e UNMIK-ut si urdhërdhënës të këtij krimi”, ishte shprehur Kurti.
Sot, si pushtetar, në prag të mbledhjes së radhës për Kosovën në Këshillin e Sigurimit të Kombeve të Bashkuara, kryeministri Albin Kurti e ka pritur në zyrën e tij në Qeveri shefin aktual të UNMIK-ut dhe Përfaqësuesin Special të Sekretarit të Përgjithshëm të Kombeve të Bashkuara, Zahir Tanin.
Tanini, siç njoftoi Zyra e Kryeministrit, ia prezantoi Kurtit në pika të shkurta përmbajtjen e raportit të Misionit të Kombeve të Bashkuara në Kosovë që do të prezantohet në Këshillin e Sigurimit të premtën. Raporti fokusohet në reformat e qeverisë, sundimin e ligjit, çështje të sigurisë si dhe gjendjen dhe menaxhimin e pandemisë, shkruan Gazeta Express.
Kurti e falënderoi Taninin për këtë, duke ia shprehur atij disa shqetësime lidhur me pluralizmin dhe demokracinë në komunat me shumicë serbe në Kosovë.
