Përfaqësues amerikanë dhe zyrtar të lartë talibanë do të zhvillojnë bisedime këtë fundjavë rreth kontrollimit të grupeve ekstremiste në Afganistan dhe lehtësimin e evakuimit të qytetarëve të huaj e afganë nga vendi, kanë thënë zyrtarë të të 2-ja palëve.
Ky është takimi i parë që nga tërheqja e forcave amerikane nga Afganistani në fund të gushtit, duke i dhënë fund pranisë dydekadëshe atje, me ç’rast talibanët u rikthyen në pushtet. Bisedimet do të zhvillohen në Doha, kryeqytet i Katarit.
Zëdhënësi i talibanëve me bazë në Doha, Suhail Shaheen, i tha kësaj agjencie se në bisedime do të diskutohet edhe për marrëveshjen e paqes, të cilën Uashingtoni dhe talibanët e nënshkruan në vitin e kaluar. Kjo marrëveshje ia kishte shtruar rrugën tërheqjes përfundimtare të ushtrisë amerikane.
“Po, ka një takim për raportet dypalëshe dhe zbatimin e marrëveshjes së Doha-s. Do të mbulohen shumë tema”, tha Shaheen, shkruan Associated Press.
Shtetet e Bashkuara t’u bëjnë trysni talibanëve për t’i zbatuar premtimet e tyre dhe për t’i lejuar amerikanët e të huajt tjerë që të largohen nga Afganistani, bashkë me afganët që dikur kanë punuar për qeveritë e huaja, tha një zyrtar amerikan, transmeton Gazeta Express.
Pritet që amerikanët të bëjnë trysni ndaj talibanëve edhe për të drejtat e grave dhe vajzave, shumë prej të cilave raportohet se nuk po kanë mundësi të kthehen në shkolla e në vendet e punës. Nga talibanët do të kërkohet edhe formimi i një qeverie gjithëpërfshirëse, shtoi zyrtari amerikan.
