Kryeministri i Australisë i ka përshkroi mediat sociale si një “pallat frikacakësh” dhe paralajmëroi se platformat dixhitale përfshirë Facebook duhet të mbajnë përgjegjësi për komentet shpifëse të postuara në mënyrë anonime, transmeton InLajmi.
Komentuesit anonimë që përdorin mediat sociale për të sharë dhe ngacmuar janë bërë fushëbeteja e fundit midis qeverisë së kryeministrit Scott Morrison dhe gjigantëve të teknologjisë amerikane.
Qeveria dëshiron që përdoruesve të mediave sociale t’u kërkohet të identifikojnë veten e tyre.
Australia miratoi disa ligje këtë vit që detyrojnë Google dhe Facebook të paguajnë për gazetarinë, vendi poashtu sfidoi kompanitë e teknologjisë duke krijuar një ligj që mund të burgoste drejtuesit e mediave sociale nëse platformat e tyre transmetojnë imazhe të dhunshme.
Morrison tha se platformat që nuk zbulojnë identitetet e njerëzve që postojnë komente shpifëse duhet të mbajnë përgjegjësi për ato komente.
“Frikacakët që hyjnë në mënyrë anonime në mediat sociale dhe ofendojnë njerëzit, i ngacmojnë dhe përfshihen në deklarata shpifëse, duhet të jenë përgjegjës për atë që thonë”, tha Morrison.
“Mediat sociale janë bërë pallat frikacakësh ku njerëzit thjesht mund të mos thonë kush janë, të shkatërrojnë jetën e njerëzve dhe t’u thonë njerëzve gjërat më të turpshme dhe fyese, dhe ta bëjnë këtë pa u ndëshkuar,” shtoi ai, përcjell AP.
Komentet e tij vijnë ndërsa vendi po nxiton të rishkruaj ligjet e tyre për shpifjen pasi Gjykata e Lartë muajin e kaluar krijoi një precedent për epokën e internetit, duke vendosur se mediat mund të mbahen përgjegjëse për komentet shpifëse të postuara nga palët e 3-ta në faqet e tyre në Facebook./InLajmi/
