Kombëtarja e Italisë është mposhtur nga Spanja me rezultat 2-1, në gjysmëfinalen e Ligës së Kombeve.
Në takimin e zhvilluar në stadiumin ‘San Siro’ në Milano, golat për Spanjën i realizoi Ferran Torres (17’ dhe 45+2’), kurse golin e vetëm për italianët e shënoi Lorenzo Pellegrini (83’).
Pas ndeshjes ka folur trajneri i Italisë, Roberto Mancini, i cili ka thënë se Spanja ka luajtur shumë mirë teknikisht.
Me pas ai foli edhe për përjashtimin e Bonuccit me karton të kuq, si dhe për vërshëllimat e tifozëve në drejtim te Donnarummas.
“Kështu janë ndeshjet. Ndonjëherë disa episode ndikojnë në to. Pjesa e parë mund të kishte përfunduar 1-1 shumë lehtë. Ata luajnë shumë mirë teknikisht, por ky është një zhgënjim. Ne duhet të kishim qëndruar me njëmbëdhjetë lojtarë, ne bëmë një gabim që në këto nivele nuk duhet të kishim bërë”, tha fillimisht Mancini.
Përjashtimi i Bonuccit? “Unë nuk e kam parë rastin, por kjo nuk ndryshon asgjë. Leo duhej të ishte i kujdesshëm para se të ndëshkohej për protesta.
”Vërshëllimat për Donnarumma? “Më erdhi keq”, përfundoi Mancini, transmeton Gazeta InFokus.
Kjo ishte humbja e parë e Italisë pas 37 ndeshjeve radhazi pa disfatë.
