Auditorja e Përgjithshme, Vlora Spanca në mbledhjen e mbajtur të Komisionit për Buxhet, Punë dhe Transfere, ka kërkuar nga deputetët që t’i aprovohet ulja e pagës së saj me 25%, raporton InLajmi.
Spanca gjatë raportimit në këtë komision, e ka arsyetuar kërkesën e saj duke thënë se është bazuar në situatën e vendit dhe standartet.
Ajo ka kërkuar ulje nga paga 3.821 euro në 2.800 euro, duke pritur miratim nga deputetët për propozimin e saj.
“Sa i përket diskutimit të pagës, e vlerësoj lartë duke i marr parasysh rrethanat e reja, duke marrë parasysh standardet dhe rrethanat që jemi kam menduar se do të ishte më e arsyeshme që paga e auditorit të jetë më e ulët për shkak se si zyre ne duhet të demonstrojmë shembull, dhe propozimi im ka qenë se jo një pagë më e lartë se 2.800 euro do të ishte e mjaftueshme. Unë uroj që të merret parasysh propozimi im, sepse ju jeni ligjvënës”.
Kërkesa e auditores është shtyrë për rishqyrtim në javën e ardhshme, pas bërjes së disa analizave për paga edhe në institucione të tjera./InLajmi/
