Komisioneri i Bashkimit Evropian për Zgjerim, Oliver Varhelyi, është pjesëmarrës në Samitin e Sllovenisë, përcjell InLajmi.
Ai në një fjalim dhënë për media është shprehur se liderët evropianë do ta bëjnë të qartë se janë të përkushtuar që vendet e Ballkanit Perëndimor të jenë pjesë e BE-së.
Varhelyi poashtu shtoi se duhet të hapen negociatat për anëtarësimin e Maqedonisë së Veriut dhe Shqipërisë, si dhe të hiqen vizat për kosovarët.
Ai foli edhe për Serbinë duke thënë se duhet të hapen kapitujt e anëtarësimit për të.
“Sot është një ditë shumë e rëndësishme. Liderët tanë jo vetëm që do ta konfirmojnë, por do ta bëjnë gjithashtu shumë të qartë se jemi të përkushtuar për integrimin e plotë dhe anëtarësimin e vendeve të Ballkanit Perëndimor në BE. Prandaj, ne duhet të marrim përgjegjësitë dhe vendimet që na çojnë te kjo, çka nënkupton hapjen e parë të konferencës ndërqeveritare me Maqedoninë e Veriut dhe Shqipërinë, hapjen e kapitujve me Serbinë, përshpejtimin e punës tonë që Bosnja dhe Hercegovina të bëhet vend kandidat dhe heqjen e vizave për kosovarët”. /InLajmi/
